1 қыркүйекте Алматы қаласындағы UN Plaza алаңында Impact Team 2050 ұлттық жастар диалогы — «Тең деңгейдегі ядролық диалог: жастардың атом саласына жолы» атты кездесу өтті.
Іс-шара «Росатом» мемлекеттік корпорациясы бас директоры жанындағы Impact Team 2050 Халықаралық жастар консультативтік кеңесінің қызметі аясында ұйымдастырылды. Диалог Алматыдағы НИЯУ МИФИ филиалы мен басқа да жоғары оқу орындарының студенттерін, UN Discussion Club Almaty қатысушыларын, жас мамандарды, сондай-ақ ғылыми, атом және энергетика салаларының өкілдерін біріктірді.
Ядролық физика институты атынан өндіріс жөніндегі бас директордың орынбасары Евгений Ермаков сөз сөйледі. Сараптамалық сессия барысында ол ЯФИ қызметінің негізгі бағыттары — іргелі және қолданбалы зерттеулер, ядролық және радиациялық технологиялар, медицина мен өнеркәсіпке арналған радиоизотоптық өнімдер өндірісі, сондай-ақ атом саласы үшін кадрлар даярлау туралы айтты. «Ядролық ғылым — энергетика, медицина, өнеркәсіп, экология және басқа да көптеген салаларға арналған технологиялар жасалатын негіз. Оның зор әлеуеті дәл осы пәнаралық сипатында», — деді Евгений Ермаков. Қатысушылар Қазақстандағы атом энергетикасының даму перспективаларын, сұранысқа ие құзыреттерді және жастардың мансаптық мүмкіндіктерін талқылады. Практикалық бөлімде студенттер мен жас мамандар атом саласындағы мамандықты таңдауға кедергі келтіретін негізгі факторларды айқындап, кәсіптік бағдар беру жұмысын дамыту, ғалымдармен кездесулер өткізу, мектептер мен жоғары оқу орындарының ғылыми орталықтармен және салалық кәсіпорындармен ынтымақтастығын кеңейту жөнінде ұсыныстар әзірледі.
