Бүгін Ядролық физика институтында Korea Hydro & Nuclear Power Co. (KHNP-CRI) Орталық зерттеу институтының өкілдерімен ғылыми-техникалық ынтымақтастықтың болашағы талқыланған кездесу өтті.
KHNP-CRI делегациясын институт директоры Шин Хо Чхоль басқарды. Сонымен қатар, кездесуге Корея Республикасының Алматыдағы консулы Сонг Сун Мин және жетекші ғылыми қызметкерлер қатысты.
KHNP-CRI – Оңтүстік Кореяның ядролық саласындағы негізгі ғылыми институттарының бірі, ол озық ядролық технологияларды әзірлеумен, сондай-ақ атом электр станцияларының қауіпсіздігі мен тиімділігін зерттеумен айналысады.
Кездесу барысында KHNP-CRI директоры Шин Хо Чхоль ЯФИ-мен ғылым және бірлескен зерттеулер саласындағы ынтымақтастықты нығайтудың маңыздылығын атап өтті:
“Біздің ынтымақтастығымыз біз үшін өте маңызды. Біз ұзақ мерзімді серіктестікке үміттенеміз, тәжірибемізбен бөлісуге және атом энергетикасының дамуын қолдауға дайынбыз”, – деп атап өтті.
Өз кезегінде, Институт бас директоры Саябек Сахиев институттың ашық және өзара тиімді ынтымақтастыққа дайын екенін растады:
“ЯФИ әрдайым бірлескен жұмысқа ашық. Біз ядролық технологиялардың бейбіт мақсатта дамуы тек білім алмасу мен бірлескен зерттеулер арқылы жүзеге асатынына сенімдіміз.”
Тараптар бірлескен зерттеулердің маңыздылығын атап өтіп, екі институттың әлеуеті ұзақ мерзімді және нәтижелі ынтымақтастықты қалыптастыруға мүмкіндік беретінін жеткізді.
