Ядролық физика институты (ЯФИ) мен Жапонияның атом энергиясы агенттігі (JAEA) атом саласы үшін кадр даярлау бағытындағы ынтымақтастықты одан әрі дамытуға мүдделі екенін растады. Тиісті уағдаластықтар 21–22 шілде күндері Алматыда өткен Инструкторларды даярлау бағдарламасы (Instructor Training Program, ITP) Басқарушы комитетінің отырысы қорытындысы бойынша қол жеткізілді.
Отырыс барысында тараптар көпжылдық әріптестіктің қорытындыларын шығарып, Instructor Training Course (ITC) және Follow-up Training Course (FTC) білім беру бағдарламаларын іске асыру нәтижелерін талқылады, сондай-ақ әрі қарайғы ынтымақтастықтың басым бағыттарын айқындады.
Сапар аясында Ядролық физика институтының бас директоры Саябек Сахиев Институт қызметінің негізгі бағыттарын, соның ішінде ғылыми зерттеулерді, зертханалардың жұмысын және жүзеге асырылып жатқан жобаларды таныстырды.
Негізгі назар мамандарды даярлауды жетілдіруге, білім беру бастамаларын кеңейтуге және бірлескен жұмыстың жаңа формаларын дамытуға аударылды.
Ынтымақтастықтың негізгі бағыттарының бірі — JAEA Жапонияда іске асыратын Instructor Training Course (ITC) бағдарламасы болып қала береді.
Бұл курс заманауи білім мен технологияны қолдана білетін ғана емес, елге оралғаннан кейін сол білімді әріптестеріне жеткізе алатын мамандарды даярлауға бағытталған. Үш–алты аптаға созылатын бағдарлама зерттеу реакторларын инженерлік сүйемелдеуді, ядролық және радиациялық апаттарға дайындықты, сондай-ақ қоршаған ортаның радиоактивтілігін мониторингтеуді қамтиды.
2013 жылдан бері ITC бағдарламасы бойынша Ядролық физика институтының тоғыз қызметкері оқудан өтті. 2026 жылы бағдарламаға тағы үш маман қатысады.
Арнайы назар алынған білімді ел ішінде таратуға бағытталған Follow-up Training Course (FTC) бағдарламасын іске асыруға да аударылды. Бұл курстарды JAEA-де оқудан өткен мамандар жапон сарапшыларының әдістемелік қолдауымен өткізеді.
2026 жылы Институт базасында екі FTC курсы өтті: 1–4 маусым аралығында — радиоэкологиялық мониторинг бойынша, ал 8–11 маусым аралығында — реакторлар инженериясы бойынша.
FTC бағдарламасы Институтта 2011–2014 жылдары жүзеге асырылған. 2023 жылдан бастап курстар қайта жанданып, жыл сайын өткізіліп келеді. Сонымен қатар JAEA мамандары Институтта жыл сайын екі-үш дәріс оқиды.
