Massachusetts Institute of Technology (MIT) қабырғасында Ядролық физика институты делегациясының жұмыс кездесулері тараптардың академиялық ұтқырлықты дамытуға және бірлескен ғылыми бастамаларды жүзеге асыруға өзара мүдделі екенін растады.
10 ақпанда Ядролық физика институтының бас директоры Саябек Сахиев MIT өкілдерімен ғылыми өзара іс-қимылды тереңдетуге және ынтымақтастық форматтарын кеңейтуге бағытталған бірқатар келіссөздер жүргізді.
Алғашқы кездесу MIT International Science and Technology Initiatives (MISTI) бағдарламасының басқарушы директоры, MIT-тің Қазақстан, Армения және Литвамен ынтымақтастығын үйлестіруші Екатерина Забровскимен өтті. Тараптар MIT студентінің ИЯФ-та өткен жазғы тағылымдамасының қорытындыларын шығарып, алғашқы алмасу тәжірибесінің табысты болғанын атап өтті. Бас директор Институттың жазғы тағылымдамадан өту бағыттарын кеңейтуге және MIT студенттерін қабылдау мүмкіндігін арттыруға дайын екенін жеткізді.
Келесі кездесу MIT-тің Ядролық ғылым және инженерия кафедрасында оның деканы, профессор Бенуа Форжемен өтті. Талқылау барысында Қазақстандағы алғашқы атом электр станцияларын салу жоспарлары, сондай-ақ ВВР-К зерттеу реакторында перспективалы материалдарды реакторішілік сынау нәтижелері таныстырылды.
Профессор Форже өз кезегінде кафедраның даму басымдықтарын, соның ішінде ядролық бөліну физикасы мен термоядролық синтез саласындағы зерттеулерді атап өтті. Тараптар радиациялық материалтану және физикалық үдерістерді компьютерлік модельдеу бағыттары бойынша екі институт зертханалары арасындағы ынтымақтастық мүмкіндіктерін талқылады.
Кездесулер қорытындысы бойынша академиялық алмасуды одан әрі кеңейту және бірлескен ғылыми бастамаларды пысықтау жөнінде келісімге қол жеткізілді.
